عندي استفسار صاير ياكل راسي من مدة، كيف الواحد يفرق بين إنه فعلاً فقد الشغف وبين إنه بس منهك ومحتاج يرتاح، لأني صرت أصحى وما عندي رغبة لا بالشغل ولا بالحكي ولا حتى بالأشياء اللي كنت أتحمس لها، ومع هذا إذا أخذت يوم إجازة ما أرتاح، أضل طول اليوم حاسس بالذنب وأقول ضيعت وقتي وما أنجزت شي، وإذا اشتغلت أكون حاضر بجسمي وغايب بعقلي، أنجز الضروري وبس وبعدها أحس إني ركضت مسافة طويلة وأنا واقف بمكاني، حاولت أغير الروتين، سافرت يومين، قطعت السوشال ميديا، رجعت أمشي، اشتريت أشياء كنت أبيها، لكن كل شي يعطيني دفعة بسيطة وبعدها أرجع لنفس الفراغ، وأكثر شي يخوفني إني مو حزين بالشكل المعروف، يعني ما أبكي ولا أنهار ولا أقول الحياة سودا، أنا بس بارد بشكل مو طبيعي، الأشياء الحلوة تمر علي وما تحركني، والأخبار السيئة أستقبلها كأني كنت متوقعها، حتى الناس اللي أحبهم صرت أتأخر بالرد عليهم مو لأني ما أبيهم، بس لأني أحس أي محادثة تحتاج طاقة ما عندي منها شي، وأخاف أشرح لهم فيحسبون إني أتدلّع أو أتغير عليهم، مرات أقول يمكن كبرت وصرت واقعي، ومرات أقول لا هذي مو واقعية هذي روح مطفية، والمشكلة إني ما أعرف من وين أبدأ أصلحها، لأنك لما تعرف وش يوجعك تقدر تعالجه، بس لما يكون كل شي باهت ومافي سبب واضح تصير حتى فكرة العلاج ثقيلة.