نحب نعترف بحاجة تبدو إيجابية من برا بصح راهي دايرة لي ضغط كبير، أنا تبدلت بزاف هاد الفترة وبديت نحب روحي شوية بشوية، وليت نقول لا، وليت نبعد على الناس اللي يستنزفوني، وليت نخرج وحدي ونشري حاجة تعجبني بلا ما نستنى مناسبة، وبديت نآمن بلي حياتي ما لازمش تكون كلها تضحية باش نستاهل الاحترام، المفروض نفرح بهاذ التغيير، بصح الغريب إني كل خطوة نديرها لقدام تجيب معاها حزن على السنوات اللي فاتت، كي نكتشف بلي كان يحقلي ندافع على روحي نحزن على المرات اللي سكت فيها، كي نعرف بلي الحب ما لازمش يوجع نحزن على كل علاقة بقيت فيها وأنا نقنع روحي بالصبر، كي نرتاح نهار كامل بلا تأنيب نذكر قداه من مرة مرضت وكملت نخدم باش ما يقولوش علي ضعيف، يعني الشفاء ما جاش فرحة صافية، جا ومعاه جنازة النسخة القديمة مني، النسخة اللي كانت تحاول ترضي الجميع وتقبل الفتات وتقول الحمد لله على الأقل ما خسرتهمش، وفي بعض الأيام نشتاقلها رغم إنها عذبتني، لأنها كانت معروفة وسهلة على الناس، أما النسخة الجديدة كل يوم تدخل في صدام، ناس كانوا متعودين على سكوتي قالوا تبدلت، ناس كانوا يستفيدوا من وقتي قالوا وليت أناني، وحتى أنا مرات نشك في روحي ونقول يمكن فعلًا زدت فيها، يمكن الحدود اللي حطيتها قسوة، يمكن الراحة كسل، يمكن حبي لنفسي غرور، وبعدها نتذكر كيف كنت ننام وقلبي ثقيل وكيف كنت نبكي على حاجات بسيطة لأنها كانت آخر قطرة فوق تعب سنين، ونفهم بلي الرجوع ماشي حل، أكثر حاجة تعلمتها إن الإيجابية ماشي كل صباح تفيق تضحك وتكتب كلام جميل، مرات الإيجابية إنك تتحمل ناس يزعلوا منك لأنك بطلت تظلم نفسك باش ترضيهم، ومرات إنك تعترف بلي الشفاء يوجع هو ثاني، لأنك وأنت تتعافى تشوف بوضوح قداه كنت تستاهل أحسن من البداية، وأنا لسه ما وصلت لنسخة مثالية ولا حليت كل عقدي، بصح لأول مرة نحس إني واقف في صفي، وحتى لو الطريق طويل ومليان تردد، على الأقل ما عدتش نمشي ضد نفسي.